Нягледзячы на рэлятыўна павялічаны аб’ём майго вольнага часу, зьмест “Невідочнага места” на працягу году (адзначанага даволі плённай перакладніцкай і аўтарскай супрацай з чэскім сюррэалістычным выданьнем “Аналягон” – знаўцы чэскай могуць зацаніць інтэрвію зь ягоным галоўным рэдактарам Францішкам Дрые) заставаўся нязьменным. Мяркуючы паводле цяперашняй сытуацыі й магчымасьцяў аўтара, хутчэй за ўсё так застанецца й на працягу году наступнага – таму чытайце пільна новы выпуск! Ён задуманы як своеасаблівы дадатак да “чэскага нумару” часопіса “Архэ” (у якім, дарэчы, пабачыў сьвет беларускі пераклад “Нататкаў з творчага дому”, зроблены Марыйкай Мартысевіч – прывітаньні ёй і Сяргею Сматрычэнку!). Гэтым разам вы знойдзеце на сайце вершы І.Г.Крхоўскага й артыкул аўтара “Брытанскіх лістоў” Яна Чуліка пра кнігу Мэры Гайман, прысьвечаную гісторыі Чэхаславаччыны, а таксама накід “Гусітаў” Л.Клімы й эсэ скандальнага публіцыста-фрайдыста Яна Стэрна. Дазволю сабе парэкамэндаваць вашай увазе ўласны артыкул пра Л.Кліму на сайце часопіса “Прайдзісьвет”, крытыку апошняга раману Я.Топала “Па сьцюдзёнай краіне”, прысьвечанага Беларусі, а таксама яшчэ, магчыма, не надрукаваны тэкст для часопіса “Запісы БІНІМ” пра беларускага атамана Вячаслава Разумовіча-Хмару. Упэўнены, што вы ў курсе, што ня так даўно выйшаў новы нумар альманаху эмігранцкай літаратуры “Беларус”, у якім апрача часткова вядомых наведнікам сайту маіх вершаў ільга прачытаць прозу “Сямнаццаць імгненьняў музы” – для тых, для каго альманах недаступны, публікуем тэкст безь некаторых памылак друку. Дадаем таксама лінк на новыя кліпы “Паддашша” – ці дакладней “спробы” кліпаў, зробленыя на працягу году. Дзякуй за Вашу ўвагу, да сустрэчы.

© Макс Шчур, 2009